【晨課起筷馬】上名率八成 係型嘅！

第2場四班1200米，不得不承認，經過上季未能達標慘痛經歷後，今季葉楚航作風180度轉變，至今3個賽日共派馬上陣10次，獲得2冠1亞5季，八成上名率冠絕同儕，旗下馬匹備戰透明度高，陣上演出亦見連貫，暫時有番當年冠軍練馬師風範。

「友心友型」唔經唔覺都已7歲，講真，好難寄望再有大幅進步，不過經過上季低潮後，目前評分再次降至有利水位，馬匹健康亦未出現過太大問題，只要肯認真琢磨，必有翻身機會。

「友心友型」今季早喺8月份已復課，至今6課快跳加1課大閘，備戰工夫完整無缺。9月9日試咗鋪1200米泥閘，由布文出試，起步後鞍上人刻意拖慢居馬群內疊，沿途有遮擋下走得好順滑，轉彎時順勢向外移出望空，走至最後200米左右，先認真輕推幾步，馬匹即有反應，並逐步加速竄上，以第3名過終點，試來點到即止，表現極之討好。今次上陣，一哥潘頓騎番，當然唔會手軟喇！

■陳志懷