德國打吡大賽亞軍 凱旋門大賽前一半股權易手

應屆德國打吡冠軍「月正滿天」(Fantastic Moon)，早前轉戰法國，贏完尼爾錦標之後，就收到唔少報價求售，希望可以易主出戰法國凱旋門大賽，但馬主Liberty Racing已經拒絕唔賣，反而佢嘅蹄下敗將「影城大亨」(Mr. Hollywood)，就出現股權變動，大賽之前一半股權易手。

今次買入「影城大亨」一半股權嘅馬主，正正係法國凱旋門大賽嘅贊助商，卡塔爾集團話事人Sheikh Abdullah Bin Khalifa Al Thani ，屆時佢就可享有雙重身份，除咗係賽事贊助主禮嘉賓之外，仲會係參戰馬主。

「影城大亨」至今5戰取得2冠3亞，雖然德國打吡不敵「月正滿天」後，上場巴登大賽又再飲恨得亞，至今尚未贏過G1，不過新舊馬主對於「影城大亨」嘅展望，抱有一定憧憬。

「影城大亨」喺今屆凱旋門大賽，將會以卡塔爾傳統綵衣出戰，賽後此駒將會運返德國科隆，繼續由練馬師顧奧義訓練。