擸走金玫瑰 莫雷拉攞到今年第9個G1

今日澳洲有連場好戲上演，除咗有墨爾本考菲爾德馬場嘅木下錦標，喺新南威爾斯嘅玫瑰崗馬場，亦舉行只限3歲馬上陣嘅1400米G1金玫瑰錦標，莫雅更專程南下代替早前因墮馬受傷仍未復出嘅麥道朗，夥拍華禮納訓練嘅應屆金拖鞋大賽冠軍Shinzo上陣，可惜此駒表現平平，只以第9名過終點。

不過，即使Shinzo失準，華禮納另有王牌，由最近先由日本飛去澳洲嘅莫雷拉策騎嘅Militarize，今年4月已經喺雷神胯下贏咗兩場G1，估唔到今次人馬再度合作立即擦出火花，最後階段交出凌厲衝刺擊敗由見習生郭步陞策騎嘅Encap，季軍就係羅理雅嘅大熱門Cylinder。

值得一提，雖然莫雷拉曾受髖骨傷患困擾，更一度打算退休，但佢今年成績非常之好，計埋今場佢喺2023年已經累積9場一級賽頭馬，認真犀利。