贏產經賞壯行色 李慕華再向凱旋門進發

李慕華昨日喺中山競馬場上陣，成功起孖兼捧盃，當中以Rousham Park勝出重頭戲2200米嘅產經賞，雖然只係一場二級賽，正好為騎者周日出戰法國凱旋門大賽一壯行色。

嚟緊星期日舉行嘅法國凱旋門大賽，李慕華將會夥拍Carrot Farm嘅「遊遍汪洋」參戰，雖然自8月官宣出戰後，配搭遲遲未公布，主要係虛位以待。事關「遊遍汪洋」服役至今所得4W，3W都係由李慕華操刀(另一W為今年客串鮑志樂所勝)，人馬合拍所以希望得到呢位高手相助。

至於李慕華昨日為Sunday Racing捧走產經賞嘅Rousham Park，今季5戰4勝，自李慕華重新接手，已經連贏兩場，分別勝出G3函館紀念，與及昨日嘅G2產經賞，而勝出產經賞嘅頭馬，將可獲得秋季天皇賞嘅直接參賽資格，若然參賽將會係Rousham Park首次衝擊國際一級賽，兼且為挑戰全球評分最高賽駒「春秋分」。