【世界觀】遊遍汪洋輕秤啱數

日本馬圈對凱旋門有特別情意結，一直渴望勝出呢場享負盛名嘅大賽，可惜即使派出最強馬參戰，最終都失望而回，未能爆機。至今曾30次挑戰，都未嘗一勝。

過往喜歡馬海戰術嘅東瀛大軍，今年反璞歸真，只派出「遊遍汪洋」一駒單騎赴會。呢匹馬牌面上比起以往嘅「大震撼」、「黃金巨匠」，級數似乎差一皮，之不過響今年6月嘅寶塚紀念賽，呢匹雌馬竟然有本事追到怪物「春秋分」要影相分勝負，實力認真唔簡單。

翻查資料，過往4匹響凱旋門上名嘅日本馬「神鷹」、「大震撼」、「黃金巨匠」同「中山慶典」，都係體重470kg或以下嘅輕磅馬，只得446kg嘅「遊遍汪洋」，會唔會好似幾匹前輩咁，響呢場大賽殺入前列？