大逃偷襲成功 超霸神駒挫敗星洲馬王贏G1

前港馬「超霸神駒」，上周末再一次揚威星洲，喺新加坡三冠馬系列次關英女王盃，由巴西好手潘曉朗全程採取大逃戰略下，雖然末段力度稍減，最終仍能以頸位之先，力壓星洲馬王「林家准將」奪標。

「超霸神駒」以8歲高齡再於星洲贏一級賽，對上一仗頭馬，已經係去年底嘅新加坡金盃，馬匹踏入今季表現回落，上一仗出戰三冠馬系列頭關萊佛士盃，同樣在潘明朗胯下快放，結果末段潰敗，而勝出頭馬正係「林家准將」。

「超霸神駒」今戰突如其來再度變身，南非練馬帥李卡都歸功於潘明朗之放馬工夫，而上周末分屬潘曉朗告別戰，翌日就會飛往杜拜報到，迎接當地新馬季來臨，最後一戰以首勝一級賽及起孖告終，當然相當興奮，而他亦期望下月11日舉行嘅三冠尾關新加坡金盃，有望重臨再為「超霸神駒」掛帥。

至於「林家准將」，賽前保持今季5連勝不敗紀錄，贏完萊佛士盃後，可惜今仗飲恨，連勝斷纜之餘，三冠亦告夢醉，而下一個目標，當然係力爭於新加坡金盃一雪前恥。