【場地點樣】沙田全泥夜宴掛牌「好地」

由於兩個馬場將會輪流進行轉鋪冬草工程，呢個星期夜馬同日賽，都有轉場安排，今晚夜賽，馬迷記住將會移師沙田上演，8場泥地賽事，將於晚上7時15分開跑頭場。

就今晚泥地掛牌情況，今晨暫時預測為「好地」，硬度計指數為9.44。雖然今季泥地掛牌分得較為細緻，但場地未受到天雨影響下，相信對於泥地正常掛牌，較為易於理解，但於臨場將會有相對更新，但總結過往泥地夜賽成績，都係擺前有着數，跑法主動馬，點都係有啲優勢。

開季日賽至今只跑過4場泥地賽事，數據支持有限，甚至追溯上季泥地夜賽，亦只跑過3次合共25場賽事。論上季泥地賽事，只舉行過77場賽事，成績最突出騎師，潘頓最勁贏到開巷有17W，全泥夜賽亦係佢最突出，3次賽事執6W帶甩對手，就算今季只得4場賽事，佢亦可以贏番場分一羹，證明佢跑泥地的確有過人處。

撇開呢2期賽事手風麻麻，相信一哥都好想盡快贏馬一吐烏氣，以今晚夫卜，一手坐騎實力突出，大家不妨斟酌吓，隨時會有溫拿見面。