秋季天皇賞大陣仗 日皇德仁大駕光臨

星期日舉行嘅秋季天皇賞，除咗係世界一哥「春秋分」為名而戰力爭衞冕外，屆時日皇德仁親臨觀戰，自然成為另一矚目焦點。

日本中央競馬會昨日公布，適逢東京競馬場舉行日本競馬法100周年紀念展覽，日皇德仁周日中午，將會蒞臨東京競馬場場館參觀，並會順道欣賞當日舉行之秋季天皇賞。

今屆秋季天皇賞，亦係自1945年以來，第三位日皇親臨馬場參觀賽事，對上兩次為日皇德仁父親，上皇明仁於2005年及2012年出席，而2012年一屆，杜滿萊以「榮進閃耀」奪標，返回看台前於跑道中央落馬，向當時嘅日皇明跪地行禮，以示最高敬意。

可惜杜滿萊今屆卻無緣重溫好夢，原本卜定之實力坐騎「星映天下」(Stars On Earth)，因為右前足不良於行，馬主社台賽馬集團，已於官網公布馬匹退出競賽。