風雲系馬主探班 安仔抱女睇行家試閘

今早沙田馬場舉行4組泥閘，即使冇明星馬出試，惟場面卻異常熱鬧，似乎被風和日麗的好天氣所帶動，首先見到風雲系馬主馮國保偕同家人到達烽火台，一行4人睇完「聚風雲」由霍宏聲出試完第一組1200米泥閘後，便齊齊走到機坪搵騎者及練馬師丁冠豪商議未來出賽大計，而此駒拉士在鞍上人按韁下跑入亞席，走勢令人滿意。

此外，田泰安見頭兩組冇馬試，便趁機Call老婆Xaviere帶同女兒Isabelle到場享受片刻天倫樂，期間兩女之父的艾道拿替第二組匹「八駿笑昇」出試前，主動策馬行近駐足欄邊的田氏一家，好讓Isabelle親親馬兒，認真識做。需知安仔昨日才與充當騎馬人的弟弟Mervin兩家人一齊到主題公園玩足一日，今早仍意猶未盡搶Fo曬幸福，可見這位毛里裘斯籍好手相當顧家。