【戰況R5】越駿歡欣來投兩出全勝 羅富全：我都係處理傷患為主

今日婦女銀袋賽馬日，除咗有靚女之外，仲有型佬！型佬全羅富全今日派出「越駿歡欣」爭取連捷，結果喺巴度胯下順利以大熱門身份贏馬，呢匹馬由高伯新轉投之後兩戰全勝，勁呀型佬全！有人歡喜有人愁，主人家「美麗宇宙」喺鍾易禮胯下跑第2，未能攞威。潘頓「桃花雲」跑第3，第4名為董明朗「爸閉哥」。

賽後，羅富全表示「越駿歡欣」喺10月8日打風取消當日出唔到，刻意等跑呢場，因為評分區域70至90分，可以唔使負太重磅。今場「越駿歡欣」抽到好檔，可以跟番前少少，巴度立心走出外疊唔想塞車，結果成功報捷。巴度騎過好幾次「越駿歡欣」，匯報馬匹今季比以往容易操控，而接手後都係處理傷患問題為主，對於轉倉後兩出兩捷感到滿意。「越駿歡欣」下次會喺二班作戰，路程都係跑1600米至1800米為主。

至於廐侶「美麗在線」今仗跟前跑比較搶口，此駒都係搵遮擋跑會比較好。

第5場賽果：7-10-1-8

二重彩賽果：7-10(最後賠率73)