【戰況R4】潘頓慢閘嚇一嚇 最終都幫伍仔贏馬！

近期不停贏馬的伍廐，今日有唔少實力馬出戰，第4場四班田草2000米的「發財秘笈」更用上潘頓，臨場穩守2.9倍大熱，出閘雖然慢一慢，但好快跟番前兼埋到欄，前段步速又快，佢留得好舒服，之後早早移出中檔，直路在外欄發力上，輕鬆以2個半馬位擊敗亞軍後上馬「得勝多」及竄內欄上來的「慶萬家」，取下服役第2捷。

連贏3日以17W高據榜首的伍鵬志，表示「發財秘笈」喺閘廂企得太耐，所以馬匹想起擒，出閘稍慢，不過今場有快步速，「發財秘笈」埋到欄，但冇幾耐都拎番出生位衝，形勢有利。練者認為「發財秘笈」最佳路程應為1800米或以上，而1650米對隻馬嚟講會促少少，加上長途馬都要一至兩場熱身，先會愈跑愈好。

伍鵬志又指，「發財秘笈」上季同今季相比，無論出腳抑或成熟程度都大幅進步，今場贏馬後，升三班負輕磅仍有一定信心。

第4場賽果：4-2-14-8

二重彩賽果：4-2(最後賠率25)