再有法國賽駒東來挑機 地平流金落實跑香港盃

繼「真強」(Junko)來港出戰香港瓶，另一匹法國賽駒「地平流金」(Horizon Dore)亦已接受邀請，將於下月來港參與國際賽盛事，出戰最高榮譽2000米G1香港盃。

對於「地平流金」，香港馬迷其實喺上月英國煞科日嘅轉播賽事睇到呢匹馬嘅表現，當日係佢初次升呢跑一級賽，首戰就夠膽喺法國境外出戰極強水準英國冠軍錦標，結果該役只係敗於「鋼鐵大王」(King Of Steel)、「精緻之道」(Via Sistina)2個幾馬位得季軍。

「地平流金」與前年英國冠軍錦標「笑來威」同馬主，幕後樂於派馬遠征，而呢匹馬自去年出道至今，雖然到上場才初跑G1，但至今9戰獲得6勝2位，表現相當穩定，6月至今連跑5場2000米，共取得4冠1季佳績。

練馬師姜添衍為今次出戰香港盃，亦已卜定熟悉香港競賽環境嘅巴米高，自然期望替呢匹馬爭取佳績。