金澤競馬場跑跑吓馬熄晒燈 原因夠晒離奇！

喺綠茵場上咩事都可以發生，但因為一時大意嘅話，就好容易出意外啦。昨日(11月19日)日本金澤競馬場就發生一宗罕見意外。

由於日本已踏入冬季，好早就天黑，昨日金澤競馬場原定時間下午5點10分舉行地方競馬賽事，喺第8場1400米路程嘅賽事中，喺賽事期間突然熄晒燈，賽事鏡頭所見更是一片漆黑，就連賽事評述嗰陣都好疑惑咁話馬匹正在轉彎，但賽道上嘅燈光完全熄滅，直至跑晒成場賽事先至著番燈。由於突然冇晒燈光，騎師突然睇唔到眼前嘅事物當然非常危險，其中3駒將騎師拋下，有兩位騎師受傷清醒送院，意外中最後有一駒離世，呢場賽事最後宣告無效。

由於發生嚴重意外，當地賽馬會為確保公平，即時宣布取消第9場以及第10場賽事，賽後即時搵出突然熄燈原因，就係較錯熄燈時間，當地馬會亦深表歉意。