個個都飛佢唔飛 Chris留港搏殺

差唔多10個練馬師飛咗去新西蘭出席馬匹拍賣會，華藉練者更佔大多數，呢兩日烽火台十分靜局，尤其地下黨一排座位空框框，搵個人睇吓都無，幸好總有救星幫手，蘇偉賢(Chris)今次無飛去買馬，一於留港部署搏殺大計，明晚佢手馬當然有計，第1場五班1200米「領航神駒」及第2場五班1650米「勇進齊心」屬於good chance馬，值得予以重視。

第1場「領航神駒」剛戰同程贏4個馬位，好似完全變咗身一樣，趁住馬匹狀態喼得到，原裝配搭再拚可謂戰意無敵，第2場「勇進齊心」上仗鍾易禮胯下搏得亞軍，幕後未盡滿意，今換番嫡系楊明綸主轡，轉倉未交代馬必定盡鍊。

練者在朝早也有出擊動靜，7時30分，上述兩駒由助手加課往內圈踱步熱身，Chris踩住架戰車出烽火台督操，全程眼甘甘望到實，緊張之情表露無遺，看來呢口馬房孖寶值得考慮。