【晨課起筷馬】蔡明紹幫自已打打氣

人生總有高低起跌嘅時候，神童蔡明紹近期手風欠順係不爭嘅事實，剛周日大賽重策「加州星球」滿以為會係轉捩點？但當日賽道形勢對貼欄跑法馬匹極之不利，向來以放馬為殺着嘅蔡明紹又點會唔知？加上同場廐侶「美麗同享」閘前落重飛偷襲失手，人在江湖身不由己，蔡明紹只不過係忠於策騎指示而已。

第2場五班1650米，「最多歡笑」今季轉投巫偉傑馬房後一直用心做足工夫，上賽前3課大閘均交由蔡明紹經手，騎練都畀咗好多心機落去，講真，馬匹狀態未致於大熟大勇，但課比課好，因而予以一定憧憬。上仗復出跑田草1400米，起步慢一慢，加上馬匹仍有外閃問題，沿途沒有遮擋之下，直路遲遲未肯攞正平衡衝刺，情緒上仍未夠穩定。復課後未有太大力催谷，只做咗兩課快跳工夫，不過就刻意除去羊毛面箍，改戴眼罩出試，走起來情緒更加集中，冇再兩頭片嘅鏡頭出現，效果正面。今仗轉戰谷草增程跑一哩，有運抽1檔起步，人馬都要加油呀！

■陳志懷