幫埋星洲自己友 連達文擸埋林家準將帥權

連達文響12月10日舉行嘅香港國際賽，唔單止獲得東瀛兵軍徵召幫手，最新消息就係會夥拍新加坡馬王「林家準將」，出戰香港一哩錦標。

連同日本賽駒「利森名園」、「輕風飛」分別出戰香港盃及香港瓶，連達文於今屆國際賽4項大賽之中，3場賽事已經卜定坐騎，去年為東瀛兵團以「瑪蓮必勝」拿下香港瓶。今年盃、瓶兩場俱有實力坐騎在手，當然希望重溫好夢。

「林家準將」去年由貝善利出戰香港短途錦標，不過騎者今年已經返回澳洲發展，今屆捲土重來轉戰香港一哩錦標，結果練馬師馬定賢就搵鄉里連達文補位幫手。

以連達文嘅級數，相信國際賽屆時不乏本地練馬師，響其餘場次搵佢搏殺，由於上次響日本客串期間，停賽累積罰滿分，今年暫不准申請前往當地客串，其實香港賽馬會大可招攬呢位好手來港客串，最終12月、1月呢個檔期，就畀麥道朗攝咗位。

連達文響跑完國際賽後，一樣好唔得閒，將會飛返澳洲繼續上陣，而響12月16日仲會響西澳家鄉披甲，屆時將會夥拍「飆跑傳奇」(Aryton)，響雅士閣馬場出戰G3淘金錦標。