【賽馬以外】咁樣大逃 喺香港係咪要審幾日？

唔知大家睇完啱啱禮拜日喺東京競馬場嘅日本盃，有咩感覺呢？全球一哥「春秋分」固然犀利，正宗有前有後無人能擋，但睇到鍾意大逃嘅「本初之海」中段放甩廿個馬位，轉入最後600米彎仲係帶離好遠時，身在現場嘅筆者都驚咗一驚，心諗唔係帶到吓嘛，結果話口未完，最後300米左右已經拉車，結果只跑第12名。不過，就算係咁，賽後應該冇日本馬迷覺得「本初之海」咁樣跑係有問題，仲會覺得跑得幾精彩添，完成呢場賽事後，幕後亦打算安排呢匹今年初捧走全球最高獎金賽事沙特盃嘅佳駟退役。

講真，筆者見到「本初之海」大逃呢一幕，真係好興奮，因為已經好少機會見到呢啲鏡頭，尤其諗番舊年香港盃，「本初之海」都有份跑，以為呢隻馬可以喺沙田馬場放甩十幾廿個馬位，可惜最終無出大逃呢一招，只係輕鬆放頭冇帶離對手好遠，結果咪輸14個幾馬位畀「浪漫勇士」，完全無威脅。

其實喺依家香港嘅賽馬環境，要求騎師出大逃呢一招，真係冇咩可能，原因並唔係佢哋唔識出呢一招，又或者無馬適合(當然，香港大部分賽事都係短途，要喺1200米賽事早段帶甩5、6個馬位，幾乎冇咩無可能，2400米就一季得3場，想出大逃都唔易)，主因係如果萬一出大逃呢招輸咗，以競賽小組嘅作風，一定會研訊跑法，隨時仲要審幾日，最後罰停賽，好似當年呂卓賢騎「一馬當先」、蘇狄雄騎「奪寶」都係畀人話放得快結果犯天條，被重罰停賽多日，甚至就算畀你大逃贏馬，就如鄭雨滇喺10年3月21跑贏「引伸波幅」，都係要畀小組告誡，內容係咁「雖然他(鄭雨滇)策騎『引伸波幅』勝出，但他應留意賽事的步速，並且確保不要製造一種令坐騎末段未能以勁勢衝刺的步速。」如果贏咗一樣畀人話，輸咗就畀人罰，仲邊有人會咁蠢做傻事。

老實講，跑馬有時要出奇制勝，大逃正正係奇招，過往唔同地方或者唔同賽事，都有騎師突然出呢招得手，好似今年8月初喺英國嘅古活盃，馬昆正正用大逃幫「亮葉仙查」爆冷建功。但其實香港競賽小組覺得大逃會影響馬匹末段衝刺，輸咗就要罰，如果把尺係咁，筆者只能話同情地了解。但另一邊廂，依家香港啲賽事經常有慢步速，又或者出現利前領嘅跑道偏差，就以剛周日為例，最尾3場嘅頭馬都係一放到底，咁點解小組又唔問吓一啲喺呢種情況吓，都要夾硬將馬匹留後嘅騎師呢？或者係小組角度，呢種騎法，真係確保坐騎末段能以勁勢衝刺，但只係一種永遠唔會過到放頭馬嘅勁勢衝刺，又有咩用呢？

■山無陵