加州星球配蘇銘倫爭衛冕 美麗同享用紀仁安

今屆香港一哩錦標暫時有14駒參戰，先後贏過11場香港國際賽嘅告東尼亦雙龍出海，派出「加州星球」及「美麗同享」出擊，前駒貴為上季香港一哩錦標盟主，估唔到今季喺騎師配搭方面卻有唔少變動，先有好拍檔潘頓決定為「永遠美麗」效力，結果「加州星球」復出用布文捧走沙田錦標，其後OK哥墮馬受傷，呢隻一哩好手就改用蔡明紹角逐馬會一哩錦標，可惜只得殿軍。

到咗正本戲香港一哩錦標，告東尼最近終於落實配搭人選，就係以萬人迷蘇銘倫掛帥，呢位高手曾憑「好爸爸」及「頌讚火星」兩奪香港一哩錦標，自然係適合人選。至於剛戰於馬會一哩錦標跑第2名嘅「美麗同享」，則會改用法國好手紀仁安策騎。