唔使上IFC！樂仔話馬場兩餸飯仲正！

周俊樂昨晚左青龍右白虎，左手騎住成哥匹「超超比」，右手執住鵬哥「小霸王」條韁繩，最終易絲起個孖，樂仔賽後接受訪問，仲好識做讚晒兩隻馬添，之後冇大差錯的話，兩匹好馬都係樂仔嫡系喇。

嚟到周日賽事，一望騎師分場表，發覺樂仔坐騎隔離得兩個簡稱，一個係「沈」字，一個係「容」字，原來佢今次7駒全部來自呢兩個華倉，人哋IFC賣高價兩餸賣到響朵，呢一邊樂仔周日食「沈」「容」兩餸，食到Jap jap聲都可能見報喇。其中頭場容廐「天時明駒」上次突然放頭輸唔遠，今鋪轉泥地小心爆得；第7場同倉「火鑽」上仗都係放得快仲唔斷入到Q，抖一排試埋閘再來，原班人馬要補中。尚有尾兩場成哥提供的「金鼓齊昇」同「知道再勝」，睇近期部署有啲搞作，樂仔周日會唔會再黐鵬哥成哥開飯？會唔會又飽到托住肚走呢？