姚本輝重用神鵰俠侶 又靠快車食尾胡？

今個禮拜三就係國際騎師錦標賽，雲集世界各地嘅高手來港競技，難得有咁多好騎師，唔少練馬師自然把握呢次難得機會同佢哋合作啦，當中一向鍾情用吓新騎師嘅姚本輝，今期谷戰亦同杜苑欣、馬昆呢對英國神鵰俠侶合作，分別將「超好運」、「駿馬快車」交畀佢哋執韁，自然值得吼實。

尤其係尾場二班谷草1800米嘅「駿馬快車」，呢匹6歲PP上季都喺國際騎師錦標賽夜跑二班同程，亦係由杜苑欣執韁，結果克服不利嘅11檔後發先至，由包尾追上嚟跑第1名，夠晒精彩，事隔一年輝哥又搵杜苑欣幫手，兼且抽2檔好位，相信佢都想重溫好夢再食尾胡啦。

另外，姚本輝過往同馬昆都試過5次合作，雖然未攜手贏馬，都有1亞1季，今次佢將第6場嘅「超好運」交畀馬昆策騎，呢匹質新馬今季兩場都跑第4名，突然轉場跑谷草1200米，且看能否交出好成績。