馬壇風頭躉 戴圖理競逐BBC年度風雲運動員獎

戴圖理雖然彈出彈入，一早定下嘅退休計劃又告擱置，明年轉戰美國，雖然並非掛靴，不過佢响今個歐洲馬季嘅出色表現，就為佢贏得競逐2023年BBC年度風雲運動員獎嘅機會。

英國BBC電視台今年經過評審委員會甄選之後，公布 2023BBC年度風雲運動員獎，最後6強名單，除戴圖理代表賽馬界之外，仲包括：女足國腳門將Mary Earps、田徑世錦賽七項全能金牌得主 Katarina Johnson-Thompson、板球名將Stuart Broad、輪椅網球名將Alfie Hewett，與及PGA高球冠軍Rory Mcllroy。

戴圖理响最後一年長駐英國嘅馬季，成績依然亮麗，本土贏咗7項一級賽，由首項舉行嘅英國二千堅尼作為序幕，到咗馬季煞科壓軸一項英國冠軍錦標，都係由佢包辦，絕對係由頭旺到尾，加埋「旋進軌跡」响法國同美國贏嘅兩項海外大賽，共摘下9項一級賽頭馬。

早於1996年，戴圖理曾經响呢個奬項選舉中獲得銅獎，而唯一代表賽馬界，可以贏得呢個獎項金獎代表，就只有前跳欄賽冠軍騎師Anthony McCoy爵士，於2010成為冠軍，及後响2015年更獲BBC頒予終身成就大獎。

英國賽馬會亦好期望戴圖理可以為賽馬運動爭光，已經積極呼籲馬迷投票支持，而頒獎典禮將於下周二(19日)响BBC電線台嘅廣播大樓進行直播，至於暫時响呢項選舉之中成為大熱門，就係替英國女足把關，晉身今屆世界盃決賽嘅副隊長Mary Earps。