【耀眼精選】都靈福星強項攻堅

跑馬雖然係有數得計嘅遊戲，但唔係1加1等於2咁簡單，當中充滿變數，任憑你數學有幾叻，對馬幾咁熟悉，都經常會因其他外在唔可以計算嘅因素，導致最終跑出嘅賽果不似預期。

啱啱嘅禮拜日第9場，賽前做功課時估到「勁速威龍」會好近磅，但橫計掂計呢匹呂廐馬就算進步6分，都仲未係「發財大師」嘅對手，所以策略上用「發財大師」行頭，「勁速威龍」排第2。只不過千算萬算，點估到賽事未開始已經結束，「發財大師」會響閘內起擒，一起步就玩大讓賽，保守估計呢一下至少損失5個馬位，最終返嚟輸4個半馬位，一場實食冇黐牙嘅頭馬，因為一個賽前冇人預計到嘅意外白白斷送，惟有嘆句「跑馬就這樣的」。

「發財大師」雖然輸咗，但不得不讚潘頓，通常欠經驗騎師面對同類情況都心急起勢推策坐騎上前，務求盡快收復失地。反而潘頓就好淡定，等匹馬踏順步韻後先至逐步加快跟番大隊，直路見大勢已去就冇再催迫坐騎，無夾硬為咗爭取一場已經贏唔到嘅頭馬，過分虛耗體力。

潘頓今次賽事共騎7駒，頭場匹「都靈福星」正宗長途氣袋，谷草2200米兩戰全勝，回師最強路程有力再贏。至於尾場「縱橫萬里」前速快而準，今仗改配潘頓，已亮起出擊信號。