鍾易禮夜賽爆冷心花放 可惜跑埋呢期又要...

正係初生之犢不畏虎，鍾易禮喺啱啱日賽夾親腳，以為足踝整親周三唔使預，點知星期二朝就已經可以試大閘，尋晚上陣更加有馬贏，騎伍鵬志隻「心花放」爆冷贏馬，累積今季第20W，已經係目前華將成績最好一個，就連因傷起步稍慢嘅華將一哥何澤堯，依家都係得16W追緊上嚟。

以Angus今季突飛猛進表現，騎技進步當然係重要因素，即使依家係5磅仔，支持度一樣無減，不過近期又為不小心策騎，停賽次數變得頻密，呢個月已經停賽咗2日，跑埋呢次賽事，更加係跨年停足3日，將會錯過26/12、29/12、01/01，諗住順開點知又要被打窒。

唯有寄望停賽前，喺周末賽事盡量爭取好成績，全日8匹坐騎，師父告東尼有成5件畀佢操刀，喺泥地新勝嘅「開心三多」，當然係重要數籌碼，而初出嘅「加州動員」，以告東尼同呢系馬嘅關係，都係有心一出即拚。

至於鍾易禮今次外線坐騎，「神魔金剛」上場泥地跑一哩試準氣量，今次回師草地，最關鍵仲係黃智弘換鍾易禮，話唔定成為Angus繼「心花放」後，再一次炮製冷門溫拿。