【大跑道】獨步天下出腳熟練

周五朝有兩匹參戰馬到大圈操練，同樣由助手踱一圈，「川河首駒」步爽有力，神采奕奕，火氣十足，一直在上佳水平；「陽光勇士」仍舊頭岳岳，情緒欠穩定，進步不多。以下是心水推介：

第2場「獨步天下」台型極之吸引，必有一番美好前景，亦因為已經4歲，出腳相當熟練。剛周四同「禪勝輝煌」彈閘，全程領先且從容不迫，走勢譽滿欄邊。

第6場「堅闖」上仗排外檔留後無可厚非，然而入直路一再搵錯位，差不多從未望空也追近，質素不俗。老實講，目前嘅「堅闖」毛色依然淡淡哋，但幾鍾意剛周三出跳淡定唔急唔搶。

第9場「手到再來」過往有好多不足之處，韁口重一再留唔住，而且出腳又凌亂，仍能交出不俗戰績非等閒。早前在從化試1200米草閘，中長距離馬照樣輕鬆放到，跑出1分11秒14時間更係當日5組同程最快，強如另一組頭馬高達112分嘅「健康愉快」都唔夠佢快，有數得計。