【世界觀】遊遍汪洋望父子制霸

日本年終壓軸大賽有馬紀念今日響中山競馬場上演，馬王「春秋分」贏完日本盃宣布退役配種去也，3歲新星「自由島」就留番下季先再出，兩大台柱缺陣，令賽事形勢突然變得緊湊，同時亦令本來係例行公事嘅表演賽，增添話題性。

池添謙一平成大獎賽之男

現役騎師陣營中，有一位好手響呢場大賽，成績仲好過武豊同李慕華呢兩位天王。視國寶武豊為目標嘅池添謙一，雖然成就拍馬都追唔到偶像，但係響有馬紀念嘅往績就更勝一籌，先後響2009年憑「夢之旅」、2011、13年「黃金巨匠」及2018年「防爆裝束」贏馬，係史上唯一可以4奪錦標嘅騎師，加上佢曾經3勝寶塚紀念，故池添謙一有「平成大獎賽之男」嘅美譽。

因為墮馬受傷，池添謙一上季無緣響有馬紀念賽上陣，今年佢會夥拍「遊遍汪洋」挑戰群雄，呢匹馬正正係替佢首奪有馬紀念嘅「夢之旅」後代，「夢之旅」當年先響春季贏寶塚紀念，再響年終獵埋有馬，成功登上4歲或以上馬王寶座。「遊遍汪洋」今季嘗試行「夢之旅」舊路，可惜寶塚紀念遇上「春秋分」只能屈居亞席，今仗唔使再對住怪物，池添謙一期望「遊遍汪洋」可以坐正，完成父子制霸。