JRA馬季壓軸G1埋齋 李慕華重奪冠軍騎師寶座

日本馬季昨日舉行煞科戰，分別響中山同阪神兩個競馬場都有賽事舉行，而焦點當然係響中山競馬場方面，有場重要壓軸戲碼，就係2歲馬2000米G1希望錦標，結果呢場頭馬，就係由李慕華埋齋，夥拍Sunday Racing名下Regaleira，以3/4身位之先，擊敗咗毛振鵬策騎另一匹並頭大熱門Shin Emperor，摘下今屆冠軍。

李慕華響昨日嘅煞科戰，更係成功起孖兼捧盃，最終以165W，擊敗151W屈居亞軍嘅宿敵川田將雅，相隔一年再度成為冠軍騎師，比起去年109W排第5嘅成績，今年對李慕華嚟講，絕對係豐收嘅一季，頭馬數字理想之餘，並且勝出18場分級賽，包括7勝一級賽，當然唔少得夥拍馬王「春秋分」所取得嘅驕人成績。

新勝希望錦標嘅Regaleira，成為歷來首匹以馬女身份，贏完呢場2歲一級賽，緊接而來嘅新馬季，自然成為進軍3歲三冠雌馬嘅矚目新星，李慕華亦話好期待新季來臨，夥拍呢匹馬進軍各項3歲重要錦標。

至於JRA今季冠軍練馬師，就由杉山晴紀以55勝，取得佢從練第8季嘅首項個人冠軍銜頭。