聖誕停賽冇休息 鍾易禮刑滿復出心花放

鍾易禮(Angus)早前因策騎「電氣騎士」阻人，被罰3個賽日之餘仲要出席騎術委員會會議以接受改進訓練。不經不覺呢3日停賽期已經完結，Angus今期跑馬地夜賽復出，共策7駒上陣。回想起剛過去停賽，Angus都表示即使喺聖誕期間停賽，但都冇休息，呢段期間都係跟隨師傅告東尼學習，期間亦留意其他騎師陣上策騎，自知今季停賽次數甚多，會改善問題，現時復出渴望爭取頭馬，希望可繼續爭取好成績。

Angus 7駒之中，列陣第5場四班1000米谷草「心花放」，上仗在其胯下爆18倍W，騎者重提上仗時指，上仗自己只臨時接手此駒，冇諗過佢陣上交出咁強走勢兼贏馬，對上場勝仗感到驚喜，此駒今季一直進步，而韁口比之前容易操控。不過此駒仍有內閃問題，即使係咁，但上仗走勢良好，贏馬加分後，自己有5磅可減，相比起上仗都唔係負太重磅，今仗仍有爭勝機會。