周日騎7駒 賈傑美獨步天下

澳洲一姐賈傑美相隔接近一年，今個禮拜日終於再次來港客串一天，為呂健威馬房嘅「包裝必勝」出戰第8場1200米G1百週年紀念短途盃，除咗呢匹短途好手，佢亦有6匹外線坐騎，分別來自呂健威、姚本輝、希斯同伍鵬志4個馬房，當中以接手第3場「獨步天下」最為特別。

4歲新西蘭PPG「獨步天下」今季兩戰都係由何澤堯執韁，上仗更於四班田草1200米打開勝門，可惜由於何澤堯尋晚尾場策騎「浪漫風采」墮馬受傷，未能參與周日沙田賽事，故此「獨步天下」由賈傑美接手，難得有一匹新勝馬作為自己今次來港客串首匹坐騎，睇吓佢能否順利打響頭炮。

另外，過往憑「遨遊氣泡」與賈傑美攜手捧走香港經典一哩賽嘅姚本輝，今次則將「萬事快」及「隱形翅膀」交畀呢位女將出擊，前駒近兩仗強配麥道朗都冇表現，剛戰更慢閘大敗，今次換人兼跑返1200米，同時重戴羊毛面箍上陣，且看如何發揮；而「隱形翅膀」目前評分較上季贏馬時低1分，今次抽1檔好位，亦要留神。