何澤堯唔騎得！呂健威兩隻搵人搏！

何澤堯剛遇意外落樓受傷，幸好人馬無大礙，騎者爭勝心強，待復出必再度奮戰。今次周日沙田賽事，倚重好拍檔何澤堯出擊的呂健威，在騎者缺陣下也依照既定部署，操好的馬繼續出擊。

呂健威今季已贏至31W，今次派7駒列陣，其中「包裝必勝」出爭第8場百週年紀念短途盃，一早鎖定與賈傑美合作，排2檔有利，隨時有驚喜。而上仗由何澤堯勝出的「獨步天下」及復出的「風生水起」也有運排1檔起步，跟好位同樣易發揮，力足再贏。

第3場四班1200米，「獨步天下」只跑過兩仗，首戰跑獲殿軍，吸收經驗後再出即贏馬，可見呂廐馬進度極佳，趁勇隔兩星期再跑，續居四班形勢大好，何澤堯唔騎得改配賈傑美配合1檔靚位，連捷在望。

第7場三班1200米，「風生水起」上季初出即贏，原本今季10月中復出，但因心律不正常要再抖抖，其後再操而最近試閘得第4名，反應不俗，賀銘年接何澤堯二攤，有望憑此駒連贏3期。