龍年行大運 聲仔勝望繼續增

踏入龍年，不少外籍騎師轉運，其中霍宏聲昨日便憑「譽友翔駒」打破一個月頭馬荒，今早他未天光已蒲頭開工，明刀明槍乘勝追擊，首匹出試馬已露搏殺端倪，乃出戰周四谷戰的廖廐馬「智勝攻略」(第1場)，並於大圈快磨800米，走來步大力雄，唔似低班馬，回看最近一次於四班谷中1200米跑第7，只負頭馬一又四份一馬位一役，今勻於五班打王牌爭同程，必然心存大欲，難怪課後見聲仔同廖康銘在機坪咬好耐耳仔，擺明食之髓味，動態殊不簡單。

此外，聲仔匹私家馬「博望坡」(第9場)也在今期有份列陣，回爭首本谷草1800米，今勻回落三班作賽，可謂虎入羊群，騎者今早也親自替此駒於大圈快試兩段，不肯假手於人，課後亦專誠走到烽火台搵呂健威匯報，戰意同樣加零一。