黎昭昇主場出擊 潘頓只吼一匹初出精英

黎昭昇開倉至今，同潘頓嘅合作最有默契，尤其喺跑馬地嘅成績，絕對係信心保證，練者今次返回主場出擊，當然預埋騎者一份，騎練全晚就只合作一匹「超級精英」。

雖然只係合作一匹，但騎練重點出擊，向來貴精不貴多，睇番紀錄，黎昭昇同潘頓近排於谷草夜賽，精兵只跑一件場合唔多，但就例不虛發，兩次合作包括12月20日贏「極速滿貫」，以至1月17日贏馬捧盃嘅「萬眾開心」，兩場合作全部贏晒，甚至剛剛沙田賀歲賽，合作一匹「世界籐王」力拚得位，可見得佢哋嘅精兵部署，成功率相當高。

至於今次呢匹初出「超級精英」，絕對係有備而來，開操至今工夫循序加辣，從化試完3課大閘，磨利返港，再由潘頓於跑馬地同田泥兩課大閘仄試，備戰空前積極，新正頭攞意頭，延續剛戰「跑得好快」爆冷食尾胡旺勢，今次「超級精英」初出兼排黃金1檔，當然有權即食。