今季由OK哥經手贏過 2匹尾磅餐士馬由佢接手...

騎師行列競爭大，能夠做到磅始終有着數，況且依家輕磅坐騎，都有唔少寶藏喺當中，巴度向來係輕磅騎師嘅佼佼者，呢次夜賽，佢就騎咗3場尾磅馬，分別係：第4場「可愛新星」(116磅)、第8場「以戰得勝」(120磅)同埋第9場「大千氣象」。

「以戰得勝」同埋「大千氣象」，都係有個共通點，就係今季喺四班布文贏馬，呢次夜賽巧合兩駒一齊由巴度出戰。當中「大千氣象」絕對係新鮮熱辣，上場轉場增程初跑一哩就贏馬，姿態輕鬆擺明超級，即使布文唔使停賽，呢場輕磅都好難騎得番，換人巴度乘勝追擊，呢次再增程跑1800米，恃質出擊一樣無難度。

至於「以戰得勝」季初已經由布文首戰即勝，回升三班總係受制於不利形勢，到有心拚搏，又總係遇上超級惡馬，正如上場田草1200米跑第3，不敵「氣勢」同「嘉應高昇」兩匹PPG新星，賽果合情合理，呢次六爺安排轉場出擊，當然係恰啲對手，可望喺弱組場合有得揮，睇嚟巴度汲取上場入位經驗，今次再騎呢匹輕磅馬，都係有心靜靜起革命。