仄一場返勝途 航哥搏殺有「禮」

贏馬後轉倉嘅例子唔常見，但上個月初「蟲草之凰」喺五班贏咗場谷草1650米後，竟然由呂健威轉投葉楚航馬房，情況都幾特別，當然威哥長期爆倉，咁「蟲草之凰」贏完升班轉吓環境，又唔算太令人意外嘅。

至於獲得「蟲草之凰」加盟嘅航哥，亦急不及待安排呢匹健康冇問題嘅馬上陣，轉倉一個月讓此駒轉場出擊，跑毫無根據嘅田草1400米，試馬味甚濃，似乎都係想睇吓馬匹有幾多斤両，結果只輸3個幾馬位得第6名，喺四班並非毫無還擊之力。仄準一場後，葉楚航立即讓「蟲草之凰」回師谷草一哩，兼且搵咗鍾易禮減5磅出擊，似乎練者都相信此駒喺四班有得鬥，呢對騎練早前先攜手贏咗匹「勝利神駒，睇吓周四能否再次交出好成績。