【蹄聲妙影】吊鐘咪亂敲 意外唔敢包

今日係年初四，先祝各位馬迷財源廣進、身體健康。自從社會復常，市民嘅衛生意識逐步減低，東星都一樣，疫情期間跑完馬，都會用消毒紙巾抹吓啲相機鏡頭，依家都無需再做呢套工夫，係咁意用風筒吹走啲濕氣就算。至於騎師入馬匹亮相圈之前，亦無需再用酒精搓手液消毒，不過喺疫情期間設立嘅馬匹號碼區域就仍然留低，其實都係好事，一來方便騎練、馬主及其親友搵路，二來令攝記認人都比較方便，邊瓣手多多都一目了然。

講開手多多，上周三跑馬地夜賽，跑到尾二嗰場，唔知係咪有人喺廂房飲到貓咗，當參戰馬行緊亮相圈，有個人手多多亂敲個吊鐘，以為自己去咗酒吧咁，隨即引起多位騎師回頭怒啤，需知呢個吊鐘係由受過訓練嘅工作人員去敲，力度一定要適中，示意騎師可進入亮相圈預備上馬，假如畀其他人士亂敲，分分鐘嚇親啲馬，小則驚閃，大則人仰馬翻，隨時危及馬伕及亮相圈內人士，所以唔好再手多多，新年流流唔好玩呢味嘢啦！

初步提供:

第5場10「家樂龍駒」

第8場5「還看今朝」

■東星