遨遊氣泡報香港金盃 挑戰浪漫勇士

三冠大賽次關，途程2000米一級賽香港金盃將於今個月25號舉行，馬會今日公布初步報名馬匹名單，共有11駒，上季盟主「金鎗六十」榜上無名，而今季成功衞冕香港盃嘅「浪漫勇士」當然有份，後駒上季喺此賽屈居亞軍，今年當然想坐正，亦一早卜定由麥道朗掛帥。

至於早前攻下首關董事盃嘅「遨遊氣泡」，姚本輝雖然曾透露想此駒專攻一哩，但始終之後冇咩合適嘅路程，因此最終練者亦讓此匹上季打吡冠軍報跑香港金盃，但上仗贏馬功臣麥道朗要騎「浪漫勇士」，今次要換人出擊，且看由邊位騎師接手，而輝哥亦讓最近贏三級賽的「觔斗雲」報跑香港金盃。

另外，告東尼則有「美麗同享」、「龍船狀元」、「錶之五知」3駒報名，方嘉柏就有「多巴先生」、「直線力山」攜手出擊，羅富全亦派出「發財先鋒」及「知足常樂」參戰，文家良亦有「安遇」報名。