賀銘年會唔會賀年賀上癮？

一到新年跑馬，騎師賀銘年就多人留意，始終個名應節呀，而剛剛賀歲賽，呢位騎師真係成功賀年，尾場佢騎住「跑得好快」爆出30倍冷贏馬呀，呢隻冇咩近績，馬迷未必買到，可能仲畀佢劏埋添，不過唔緊要，嚟緊大年初六跑夜馬，各位有機會補數，事關賀銘年騎4隻，出戰第2場四班谷一哩的「嘉寶神駒」近期連場接近；第5場義勇冠盃，「連連歡呼」上次谷1200米仲包尾追第3，走勢好勁；尚有第9場蕭家紅黑軍團的「波爾多」都係有戰鬥力嘅馬，唔可以睇小。

但講到最大機會贏馬，一定係前馬會主席周永健的「真感」，呢隻準神近5戰非一即二弗到漏油，剛戰排10檔早段留到包大尾，直路走入內欄追都話入到Q，今次第7場排6檔形勢唔會差得過上次了，睇吓係咪輪到前馬會主席同各位拜年了！