【戰況R8】真係會成大才？葉楚航：黃智弘開始進步！

今季憑「大至尊」勝出打吡嘅葉楚航，旺勢持續，今日借到10磅仔黃智弘為「大才」效力，結果後上爆出22倍冷門，此駒上季仲贏緊三班賽，如今跑四班加上騎者減10磅，跑少少變化場地，啱晒發揮。此外，葉楚航尚欠兩場非五班頭馬就合格，而馬季仲有3個半月，相信問題不大。

賽後，葉楚航話「大才」之前成日抽外檔，被迫留到太後，今次檔位好咗，佢吩咐黃智弘盡力跟係主馬群中間，騎者都做到，佢又吩咐騎者定啲，去到最後200米先打鞭，智弘跟足指示。葉楚航覺得呢位小將開始進步，會畀多啲機會佢。「大才」之前戴頭罩，畀隻馬多啲新鮮感，而佢亦相信今場淋地有啲幫助，但好需要檔位，有好檔就可以跑得好。

今場跑第2名為楊明綸35倍「佳運發」，串成$3,248.5連贏。潘頓「勇霸龍」後上第3，第4名為布文大熱門「安康萬里」。

第8場賽果：3-9-6-4

二重彩賽果：3-9(最後賠率590)