滂薄無比重臨跑女皇盃 新鮮組合挑戰冠軍一哩

星期日本地賽事有兩場G2，當然視為月尾冠軍賽馬日最後熱身，而被視為主要征港團隊之東瀛大軍，當地傳媒預計呢個星期就會不斷更新遠征陣容，繼「先見」同「消暑樂祭」，再有一舊一新加入征港行列。

香港馬迷熟悉嘅「滂薄無比」，兩度出戰香港盃後，再次接受邀請出戰女皇盃，此駒剛於去年12月跑香港盃，與「浪漫勇士」與「盧森堡」埋身肉搏，僅以短距離飲恨跑第3，返國後曾於2月底縮程1800米跑G2中山紀念賽，16駒只以第11名過終點。由於已屆8歲高齡，將會好好把握今次征港機會，爭取成績。

至於由練馬師杉山晴紀訓練之G2每日王冠盟主Elton Barows，響早前亦曾報道呢匹馬已經報名出戰冠軍一哩賽，最終落實來港向馬王「金鎗六十」挑機，並且會由香港馬迷較為陌生嘅西村淳也執韁。

Elton Barows今次來港，亦係自2016年「滿樂時」揚威冠軍一哩賽後，相隔8年再有日本賽駒出戰呢項一級賽。