告東尼爭第1,500W 梗係靠加州啦！

香港馬圈史上只得兩位練馬師嘅累積頭馬超過1,500場，分別係已退休嘅大摩(1,735W)同埋12屆冠軍練馬師蔡約翰(1,534W)，但稍後將會有另一位殿堂級練馬師達到呢個里程碑，就係告東尼喇，事關計埋尋晚嘅「花果猴王」，佢在港從練已累積1,499場頭馬，只爭1場就夠1,500W，睇嚟可以喺今個禮拜完成任務啦。

其實告東尼近期手風好順，由香港贏到杜拜，今期沙田賽事派8駒上陣，當中有3匹係「加州」系賽駒，如果由佢哋幫Tony哥贏第1,500場，肯定更具意義。而睇番呢3匹馬，除咗「加州代表」冇近績，「加州得力」連續兩場喺谷草1200米跑第4名，狀態開始回勇，今次轉跑田草1200米或會帶嚟新鮮感，況且評分減咗唔少，隨時有作為。

至於第9場四班田草1600米嘅「加州動員」，上仗終於喺同程打開勝門，姿態亦相當輕鬆，今次孭多7磅再跑一哩，繼續由艾道拿執韁，可以再下一城。