莫雷拉本周末起日本客串兩個月

日本中央競馬會最新公布，莫雷拉又再崔護重臨，由本周末(6號)起獲發客串騎師牌照兩個月，有效期直至6月5日，而雷神今次客串保薦練馬師同馬主，分別為堀宣行同「里見」系里見治。

今個星期六、日打疊賽期，莫雷拉將會喺阪神競馬場上陣，兩日嘅重心大賽，亦已卜定坐騎，星期六舉行嘅G2阪神牝馬錦標，佢就會為社台集團效力，策騎玫瑰錦標得主Masked Diva出戰，而響翌日將會成為轉播賽戲碼嘅櫻花賞(日本一千堅尼)，佢將會策騎由國枝榮訓練嘅「橡木城」(Stellenbosch)，出戰今屆賽事。

適逢日本春季賽事高峰期，雷神呢兩個月客串期間，將會有唔少機會出戰各項G1大賽，壓軸一項將會係6月2日舉行嘅安田紀念賽，睇吓屆時有會夥拍邊一匹實力馬，一撼將會出戰嘅「浪漫勇士」。

至於本月底舉行嘅冠軍賽馬日，預計東瀛兵團來港參戰，相信莫雷拉又會成為日本賽駒雷霆救兵，已接受邀請來港嘅「滂薄無比」，話唔定會繼今屆香港盃之後，人馬再度合體出戰女皇盃。