比同場對手至少高26分 金鑽貴人冇得輸？

禮拜日舉行嘅1200米G2短途錦標，究竟係唔係前短途三冠王「金鑽貴人」再次證明自己嘅最佳機會呢？事關呢匹短途好手自從上年12月攻下香港短途錦標後，今年成績就麻麻地，喺香港速度系列頭兩關賽事百週年紀念短途盃及女皇銀禧紀念盃都係三甲不入，但今次回師二級賽，即使比同場對手多孭5磅，但「維港智能」、「加州星球」均啱啱遠征不在陣中，應該到「金鑽貴人」贏番次啩。

事關講本地評分，「金鑽貴人」達132分，足足比全場第2高分嘅「嫡愛心」高26分，同場仲有5匹唔夠100分嘅馬，所以單睇讓磅，「金鑽貴人」真係非常着數，今次仲要搵到OK哥布文幫手，擺明要拚個明白。

不過，大家都要記得，喺1月尾嘅1200米G1百週年紀念短途盃，其實係平磅賽，「金鑽貴人」嘅名次係後過今次同場嘅「幸運有您」同埋由潘頓騎嘅「威力奔騰」，究竟呢匹短途王能否及時回勇？肯定係焦點所在。