鮮明藍制服夠朝氣 馬場MC來者不善

豹隠兩個月的鄭俊偉，昨晚起孖兼破悶局，季內已累積10W，重燃護級希望，今早天未光已在馬房打點的他，即使唔夠瞓亦顯得精神奕奕，並與一眾馬房員工積極做好馬匹操練工作，練者更身穿胸口印有MC(鄭俊偉英文名之縮寫)字母的馬房藍色制服，與他的戰意一樣咁鮮明。

要數今早鄭廐動態最矚目，當然係6時15分，旗下周日沙田賽事4匹參戰馬「摘星光輝」、「好如意」、「多多勇駒」及「愛馬善」，魚貫出大圈進行賽前最後試跑，其中「愛馬善」更由潘頓親自主理，與廐侶「友盈友福」拍跳兩段，期間練者特登行到去終點位附近欄邊，金睛火眼吼實4匹參戰馬的衝線畫面，緊張之情表露無遺，需知「愛馬善」上場賣到21蚊大熱門，卻意外多多跑尾二，賽後報告水蛇春咁長，惟潘一哥仍鍥而不捨，同埋計番前仗輸畀再出再捷的「嘉應高昇」一條馬頸位，不妨信多舖！