接手全倉最低分五班馬 十三少喜愛挑戰高難度

韋達兵源雄厚，好多馬主想入佢個倉，都唔係咁容易，但凡事總有例外，正如今次頭場出戰五班1400米嘅「喜愛善」，未贏過嘅馬依家得番20分，韋達答應接手後，更加成為全倉最低分嘅包尾大幡，素知韋達向來都係好勝心強，勇於向高難度挑戰，若然能夠將呢匹馬轉弱為強，自然係省招靚。

更何況以韋達嘅成績，至今28W，唔講唔知，季內五班頭馬就有7W，當中頭馬比例佔咗四分一，其實以韋廐現役五班馬分布，充斥唔少四降五嘅質新分子，餘下馬季應該仲有唔少五班溫拿見面。

對於「喜愛善」呢匹接近1300磅嘅龐然大物，三月初加盟後，先由韋達仄試一課之後，跟住課課都安排馬匹同佢拍跳，激發馬匹鬥心，而呢匹馬向來受騎，來港首季田泰安騎過3次，已獲1亞1季，如今搵番三哥跑，韋達唔單只用人有心思，就連配備都變動埋，排番個靚檔，話唔定轉倉首戰，即刻就會帶來煥然一新表現。