【蹄聲妙影】經濟不景 小心文雀亂飛

最近，場內保安不時呼籲馬迷唔好再用私人物品霸佔座位，但其實又好難嚴厲執行，趕啲唔趕啲又畀人話唔公平，只能講句先小人後君子，假如馬迷用作霸位嘅私人物品畀人攞走咗，閣下自理。不過，依家經濟不景，小心俗稱「文雀」嘅職業扒手喺場內搵食，老老竇竇，私人物品都係跟身好啲，畢竟你在明，人哋在暗。

講開扒手，最近有位行家因為要去日本同杜拜採訪港馬遠征，搞到有物品失竊。話說呢位行家去完日本採訪「維港智能」，搭飛機返嚟香港嗰陣，班機唔算爆，坐經濟倉側邊冇人，唔使爭手柄，正當爽YY之際，途中有個調咗幾次位嘅日本人，突然坐喺佢附近，其實都不以為然，但佢人有三急，去完廁所返埋座位，發現原本插喺位嘅「唉瘋」叉電線不翼而飛，而嗰位日本人亦都失蹤，嫌疑相當大，至於條「唉瘋」叉電線正版嘢嚟，都係舊幾水，又唔係鑲咗金，食餐打邊爐都唔夠，咁都有人撻，睇嚟呢隻飛機老鼠都幾等錢開飯。

初步提供:

第3場9「正氣青驅」

第8場5「觔斗雲」

■東星