雙雙減夠分 呢兩件紅黑兵團要留神

蔡約翰馬房一向唔愁兵源，當然亦唔需要安排馬匹減分出擊，但凡事都有例外嘅，好似蕭百君一家嘅紅黑兵團賽駒，就算年紀唔細或者表現唔算太突出，都唔會主動要求佢哋嘅馬轉倉或退役。而喺禮拜日沙田賽事，就有兩匹出自蔡廐嘅紅黑兵團似乎已經減夠分，分別係第2場「波爾多」同埋第4場「豪堡」，不妨吼實。

先講吓「波爾多」，呢匹6歲愛爾蘭自購馬今季評77分起步，季內第2仗喺三班谷草一哩入Q，之後都成日跑近，但威脅唔算太大，結果輸完上仗後再減2分得番60分，今次可以落到四班跑贏過嘅田草2000米，當然有機會變身啦。

至於「豪堡」雖然跑咗17次只得一個亞軍，上仗初戴半掩防沙眼罩扳至田草1800米，點知效果更差只得第11名，今次立即縮程跑1400米兼除去所有配備，話晒季初評62分，依家得番43分，足足減咗19分，今回喺四班孭輕磅，隨時有驚喜。