【戰況R1】勇冠群英難搞 蘇偉賢：楊明綸畀咗好多意見

楊明綸最近手風幾順，繼剛周三有馬贏之後，今日更加食頭胡，佢策騎蘇偉賢馬房「勇冠群英」勝出頭場五班1400米賽事，近4個賽日3次有馬贏，將季內頭馬增至11場，已追平對上兩季嘅頭馬數字。此外，楊明綸今季11W當中，有6W由蘇偉賢提供，果然係最大支持者。值得一提嘅係，楊明綸與蘇偉賢合作取得6W當中，有5場係何良馬房舊部。

賽後，蘇偉賢表示「勇冠群英」去年12月由周俊樂策騎的一仗有接近走勢，但之後進度徘徊，後來喺從化戴眼罩試閘好，所以上仗開始加戴眼罩，結果交出更接近走勢。不過「勇冠群英」好後生，之前都好急，楊明綸畀咗好多意見，認為隻馬唔可以困死，最好拎出去衝。蘇偉賢表示「勇冠群英」喺五班有能力，如果回升四班，可能要有好大轉變先會更上一層樓。

今場跑第2名為田泰安「喜愛善」，潘頓「怡昌勇士」後上第3，第4名為班德禮「無敵精英」。

第1場賽果：7-13-2-4

二重彩賽果：7-13(最後賠率30)