今晚壽星仔 楊明綸爭取勝利過三關

今晚賽事，適逢楊明綸36歲正日生日，贏馬自然係收到嘅最佳禮物，其實以Keith呢輪手風正順，雖然每次出賽次數唔多，但就頻頻把握到機會，單係近4期賽事，3次有馬贏，4月起步更加係兩連勝，今晚更加有6駒響手，直落過三關絕對不是夢。

以楊明綸對上兩季成績都係只得11W，今季成績反彈，依然已經追平咗呢兩季頭馬數字，往後當然希望頭馬數字持續攀升，擺脫歷來被視為弱勢一群。

今季Keith頭馬主要來自蘇偉賢，今晚有頭場「綠燈」合作，當然期望會有火花，不過今晚半數坐騎就來自丁冠豪，雖然馬房今季低潮，以目前成績走勢，要達標難度極高，但廐主心態，當然係盡贏求交代。

至於楊明綸同丁冠豪呢對騎練今季合作，暫時都係零交收，但亦有上名紀錄，新鮮熱辣莫過如上期日賽，「永勝金駒」愈追愈近跑第3成大冷位，情況一如今晚嘅「勝利同盟」，上次谷草一哩已經殺入冷腳，再加埋另一個護級倉鄭廐邊線分子「木火龍駒」，楊明綸今晚依然不乏機會贏馬賀壽。