叻過世一 盈寶奇嶽成為日本新一代獎金王

已退役「春秋分」嘅驕人成就，去年底退役前，超過半年時間，都係高踞世界排名榜首位置，不過呢位世一，雖然戰績驕人，締造唔少馬壇紀錄，不過最近就有一項紀錄，畀另一匹泥地王「盈寶奇嶽」所打破。

「春秋分」響退役時期，累積總獎金22億1544萬6100日圓，取締咗馬后「杏目」保持嘅舊紀錄，成為日本賽馬史上獎金王，不過呢個錄保持咗唔夠三個月，就被泥地王「盈寶奇嶽」所打破，今年一連兩場遠征沙特盃同杜拜世界盃，雖然都係飲恨跑第2，埋單計數所賺美金轉番日圓，現時總獎金去到22億1567萬8200日圓，比起「春秋分」贏多咗232,100日圓，成為日本新一代獎金王。

雖然兩駒相差嘅金額，兌算只係約港幣12,000元左右，但「盈寶奇嶽」響下半年將有望打破自己紀錄。而響跑完杜拜世界盃之後，練馬師高木登以至幕後方面，已放風話呢匹7歲馬會響今年底馬季結束後退役，響下半年就已經鎖定咗兩項目標，分別係冠軍盃，以及力爭東京大賞典三連霸。