90年代法國四大天王柏兆雷 周四賽後掛靴

2024年04月24日 14:00
  • 東網電視
    更多新聞短片
    柏兆雷周四賽後結束騎師生涯。(圖片：Getty Images)
    現年51歲法國名將柏兆雷，今日對外宣布，響星期四完成埋法國南部La Teste馬場兩場賽事策騎聘約後，將會正式掛靴，結束佢33年嘅策騎生涯。
    據柏兆雷透露，隨住近年支持度大減，新一年上陣次數唔多，早已萌生退休打算，但考慮到個人理由，亦唔想令支持我嘅馬主同好友失望，所以騎多一段短時間，現階段相信會係適當時候，正式宣布我嘅退休計劃。
    呢位4屆法國冠軍騎師，不乏揚威世界各地大賽機會，而佢從騎多年，響法國以至世界各地，已經贏馬超過3700W，不過佢宣布退休，令佢無法將本土贏馬數字邁向3000W嘅紀錄，至今柏兆雷響法國已取得2995W。雖然無法刷新個人紀錄，但柏兆雷表兆並唔介意，畢竟響世界各地大賽都有佢嘅足迹，佢已經好滿意。
    至於退休之後，柏兆雷表示亦會繼續於馬圈工作，或考慮進軍育馬範疇方面，至於賽馬方面，佢表示只要時間許可，英法以歐洲各地大賽，佢都會繼續入場，感受吓大賽氣氛。
    柏兆雷掛靴，90年代被譽為法國騎師四大天王之一嘅佢，與其餘幾位天王冼毅力及查爾尼已先後退休，依家剩番巫斯義繼續馳騁綠茵場。現年51歲嘅柏兆雷，曾4次榮膺法國冠軍騎師，而且勝出大賽無數，包括4次勝出凱旋門大賽、2次法國打吡、1次葉森打吡、2次日本盃、3次有馬紀念賽、1次杜拜司馬經典賽、3次育馬者盃一哩大賽，而佢更4度勝出香港瓶、2次香港一哩錦標及1次香港盃等等。
    柏兆雷勝出主要大賽：
    ●凱旋門大賽 - 喜利是路 (1996)、名畫家 (1997)、世家集 (1998)、蘇林美亞 (2012)
    ●法國打吡 - 名畫家 (1997)、才智高 (2013)
    ●葉森打吡 - 高樓大廈 (1998)
    ●英皇錦標 - 無敵先鋒 (2010)
    ●德國打吡 - 博爾吉亞 (1997)、戴進 (2003)
    ●愛爾蘭打吡 - 飛來情 (1995)
    ●日本盃 - 森林寶穴 (2001)、荒漠英雄 (2004)
    ●有馬紀念賽 - 吉兆 (2002、2003)、荒漠英雄 (2004)
    ●秋季天皇賞 - 吉兆 (2003)、荒漠英雄 (2004)
    ●育馬者盃一哩大賽 - 金剛威 (2008、2009、2010)
    ●香港瓶 - 派得好 (1995)、博爾吉亞 (1999) 、迪諾醫生 (2007、2008)
    ●香港一哩錦標 - 海景客棧 (1999)、三連冠 (2005)
    ●香港盃 - 萬千景象 (2009)