金鎗六十最後一戰？呂健威話…

「浪漫勇士」尋日成為首匹完成女皇盃3連霸嘅佳駟，但3屆馬王「金鎗六十」最終卻未能創造連贏4屆冠軍一哩賽嘅壯舉，最終只得第4名，亦係佢在港第2次甩三甲，真係非常少有。雖然唔少人都覺得，「金鎗六十」尋日未能展開慣常嘅衝刺，應該同場地有莫大關係，但話晒呢匹馬王已屆8歲，究竟之後仲有咩部署，尋日係咪佢最後一戰呢？

呂健威尋日接受傳媒訪問時，佢先提到「金鎗六十」表現唔算差，但好明顯受場地偏淋影響，而此駒過往曾於差唔多嘅場地狀況下落敗，只係依然有啲失望，而威哥亦提到今場極有可能係此駒最後一次上陣，當然仍會與馬主再商量，但下季將轉9歲，要慎重作出決定。